അന്താരാഷ്ട്ര കേരള പഠന കോൺഗ്രസ്
കേരള വികസനത്തിനായുള്ള ആഗോള സംവാദവേദി
ജനാധിപത്യകേരളത്തിന്റെ പരിപാടി ആവിഷ്കരിച്ചപ്പോള് അക്കാദമികസമൂഹമൊന്നും ഉണ്ടായിരുന്നില്ല. പ്രൊഫഷണല് വിദഗ്ദ്ധരും കുറവായിരുന്നു. രാഷ്ട്രീയപ്രവര്ത്തകരാണ് ഈ വെല്ലുവിളി ഏറ്റെടുത്തത്. അവരുടേതായ സംഭാവനകൾ അവർ നല്കുകയും ചെയ്തു.
ഇന്നു പ്രശ്നങ്ങള് വ്യത്യസ്തമാണ്. ഒരുപക്ഷെ, കൂടുതല് സങ്കീര്ണ്ണവും. ഭൗതികോല്പാദനാടിത്തറ സുശക്തമാക്കുന്നതിലൂടെ നമ്മുടെ വികസനപ്രക്രിയ എങ്ങനെ മുന്നോട്ടു കൊണ്ടുപോകാം എന്നതിനെക്കുറിച്ചു പണ്ഡിതരും വിവിധ വിജ്ഞാനശാഖകളിലെ വിദഗ്ദ്ധരും രാഷ്ട്രീയപ്രവര്ത്തകരും തമ്മിലും രാഷ്ട്രീയപ്പാര്ടികള് - ഇടതും വലതും ഉള്പ്പെടെ - തമ്മില്ത്തമ്മിലും സംവാദം നടക്കേണ്ടതുണ്ട്. രാഷ്ട്രീയഭിന്നത നിലനില്ക്കെത്തന്നെ പ്രതിസന്ധി തരണം ചെയ്യാന് വേണ്ട നടപടികള് സംബന്ധിച്ച വിശാലമായ സമീപനത്തിന്റെ കാര്യത്തില് അഭിപ്രായസമന്വയത്തിൽ എത്താനാകണം എന്ന കാഴ്ചപ്പാടിന്റെ അടിസ്ഥാനത്തിലാണ് എകെജി പഠന-ഗവേഷണ കേൺഗ്രത്തിന്റെ ആഭിമുഖ്യത്തിൽ 1994-ൽ അന്തർദേശീയ കേരളപഠന കോൺഗ്രസ് ആരംഭിച്ചത്. ഐക്യകേരളത്തിന്റെ ആദ്യമുഖ്യമന്ത്രിയും സിപിഐഎമ്മിന്റെ സമുന്നതനേതാവും ആയിരുന്ന സ. ഇ. എം. എസ്. നമ്പൂതിരിപ്പാടിന്റെ മുഖ്യചുമതലയിലാണ് അതു സംഘടിപ്പിക്കപ്പെട്ടത്.
കേരളം നേരിടുന്ന പ്രശ്നങ്ങള്ക്കു പ്രായോഗികപരിഹാരമാര്ഗ്ഗം കണ്ടെത്താന് കൂട്ടായ ശ്രമത്തിലൂടെ നമുക്കു കഴിയേണ്ടതുണ്ട്. ജനക്ഷേമപരവും ജനാധിപത്യപൂർവ്വവുമായ കഴിഞ്ഞ കാലനേട്ടങ്ങള് കൈവെടിയാതെതന്നെ സാമ്പത്തികവളര്ച്ച ത്വരിതപ്പെടുത്താൻ എന്തൊക്കെ ചെയ്യണമെന്ന കാര്യത്തില് അഭിപ്രായസമന്വയത്തിൽ എത്തണം. സ്ഥിതിഗതികള് വിശദമായി വിലയിരുത്തി പുതിയ കര്മ്മപരിപാടി ആവിഷ്കരിക്കണം. ഒരു രാഷ്ട്രീയപാർട്ടിക്കോ രാഷ്ട്രീയപാർട്ടികൾക്കോ മാത്രമായി നിറവേറ്റാന് കഴിയുന്ന കടമയല്ല ഇത്. ഇതൊരു ദേശീയകടമയാണ്. പണ്ഡിതരും വിവിധ ശാസ്ത്ര-വിജ്ഞാനശാഖകളിലെ വിദഗ്ദ്ധന്മാരും ഇതില് സുപ്രധാന പങ്കു വഹിക്കേണ്ടതുണ്ട്.
സംസ്ഥാനത്തിന്റെ വിവിധ വികസനമേഖലകള് നേരിടുന്ന പ്രശ്നങ്ങൾ വിശകലനം ചെയ്ത് കേരളത്തിന്റെ വികസനാസൂത്രണത്തിനു ശരിയായ ദിശാബോധം നല്കാന് സഹായകമായ സംവാദവേദികളായിരുന്നു 1994, 2005, 2011, 2015 വര്ഷങ്ങളിൽ സംഘടിപ്പിച്ച ഒന്നും രണ്ടും മൂന്നും നാലും കേരളപഠന കോണ്ഗ്രസുകള്. ഇതുവരെയുള്ള അനുഭവങ്ങള് പരിഗണിച്ചുകൊണ്ട് അടിയന്തരമായി നടപ്പിലാക്കേണ്ട ഇടക്കാല വികസനപരിപാടിയും കൂടുതല് സമഗ്രമായ വികസനപരിപ്രേക്ഷ്യവും കരുപ്പിടപ്പിക്കാനാണിന്നു ശ്രമിക്കുന്നത്.
ഈ സംവാദം രണ്ടോ മൂന്നോ ദിവസങ്ങളിലെ ചര്ച്ചകളില് ഒതുക്കാനാകുന്നതല്ല. ഇക്കാരണത്താല് കേരളപഠന കോണ്ഗ്രസിനുള്ള മുന്നൊരുക്കമായി, എകെജി പഠന-ഗവേഷണകേന്ദ്രം 2023-ന്റെ ആദ്യപകുതി മുതൽ വിവിധ വികസനമേഖലകളിൽ സെമിനാറുകള് സംഘടിപ്പിച്ചുവരികയായിരുന്നു. ഓരോ സെമിനാറും ഒരു വികസനമേഖലയുടെ വിശദമായ വിശകലനം ലക്ഷ്യമാക്കിയ, ഒന്നോ രണ്ടോ ദിവസം നീണ്ട സമ്മേളനമായാണു നടത്തിയത്. വ്യത്യസ്ത വികസനമേഖലകളെ സ്പര്ശിക്കുന്ന ഗവേഷണപഠനങ്ങളിലും പദ്ധതിനിര്വ്വഹണങ്ങളിലും ഏര്പ്പെട്ടിരിക്കുന്നവര്ക്കും പ്രാദേശികവികസനപ്രവര്ത്തകര്ക്കും തങ്ങളുടെ അറിവും പ്രായോഗികാനുഭവങ്ങളും പങ്കുവയ്ക്കുന്നതിനുള്ള വേദികളായി മാറീ ഈ സെമിനാറുകള്. അതിലൂടെ യാഥാര്ത്ഥ്യബോധമുള്ളതും നിര്വ്വഹണസാദ്ധ്യവുമായ വികസനനിര്ദ്ദേശങ്ങളുടെ രൂപവത്ക്കരണം സാദ്ധ്യമായിട്ടുണ്ട്. ഇതിന്റെ തുടർച്ചയായി, ഓരോ വികസനമേഖലയും സംബന്ധിച്ച പരിപ്രേക്ഷ്യങ്ങൾ 2026 ഫെബ്രുവരിയിൽ നടക്കുന്ന കേരള പഠന കോണ്ഗ്രസിൽ ചർച്ചയ്ക്കായി അവതരിപ്പിക്കും. തുടർന്ന്, വിവിധ വിഷയമേഖലകളിൽ നടക്കുന്ന ചർച്ചകൾ ക്രോഡീകരിച്ച് ഒരു സമഗ്ര സമീപനരേഖ പഠനകോൺഗ്രസ് മുന്നോട്ടുവയ്ക്കും.